පාතල්ගේ ආතල්

    යෝගට් කඩේ අංකල්ට නොසිතූ නොපැතූ අවස්ථාවල චේන් පනින බව කැම්පස් එකේ හැමෝ ම දනිති. ඒ අතර බෙන්තර ගඟෙන් එහා පැත්තේ උන් බලෙන් චේන් පන්නා ගන්නා බවත් උන් අත්දැකීමෙන් ම දනිති.
    හිත හොඳ පාතල් දවසක් කාරිය පැත්තේ රවුමක් ගසා ඒ හැටි වැඩකුත් නැති තැන ටී එකක් ගැසීමට කියා යෝගට් කඩේට ගොඩ විය. කඩේ සිදුරු වුණු ටකරං තහඩු දෙස බැලූ ඔහු තම හොද හිත පෙන්වීම උදෙසා වචනයක් දෙකක් දැම්මේය. 
    " අංකල්, අළුතෙන් ටකරං ටිකක් බස්සල පේන්ට් පාරක් දාල ගත්තොත් කොහොමද ? බිස්නස් මෙහෙම කරද්දි උඩ යයි" ඔහු අසුරු සැණක් ගසා යාන්තමට බලපිටි පාට් එකක් දැමීය. 
    " ඕවට කොහෙද පුතා වෙලාව" අංකල් හිනා වී කීවේය. "මේ බිස්නස් එක මටත් තනියම හැන්ඩ්ල් කරන්න අමාරුයි.ඔව් ඉතින් කියන්න මොනවද ඕනේ?"
    " අහ් අංකල් මට ටී එකක් ඕනේ.." පාතල් කීවේය. 
    " ටී දාන්න බෑනේ පුතා, කරන්ට් එක නෑ වතුර රත් කර ගන්න." අංකල් කීවේය. " ඉලෙක්ට්‍රිසිටි බෝඩ් එකේ උන් ආයෙත් ස්ට්‍රයික් නේ, මහ කරදරයක් ...." 
    " ඔව් අංකල්" පාතල් දිග සුසුමක් හෙලා ගැඹුරු හඬින් කීවේය." දැන් දේශපාලන තත්වය නම් හරිම නින්දිතයි. හැබැයි හැමදේම වෙනස් වෙයි ඉක්මනට, මම පෞද්ගලිකව දෙශපාලනයේ නිරතවෙල ඉන්න හින්ද මම දන්නව ඒ ගැන හොඳට. හරි හරි අංකල් අපි ඒව අමතක කරල දාමු, එහෙනං අංකල් මට දෙන්නකො ප්ලේන්ටියක්. "
    මහ දවල් හෙණ ගහන්නා සේ අංකල්ගේ මල අසූ හාරදාහටත් උඩින් පැන ඇත. අංකල් ඒ මොහොතේ කියූ දෑ පාතල්ට අද ද මතකයට නංවාගත නොහැක. ඒ නිසා මා ද ඒ ගැන නොදන්නෙමි.
    කෙසේ හෝ පාතල් වචන ටිකක් හොයා ගන්නට සමත් වී ඇත.
    " අංකල් දන්නවද මං කවුද කියල..? " ඔහු කඩේ ටකරං දෙදරන්නට බෙරිහන් දුන්නේය.
    අංකල් රාක්කයෙන් කිඹුල බනිස් ගෙඩියක් ගත්තේය. ඒ එය වෙනකෙකුට ඔතා දීම පිණිසය. එහෙත් ඒ මොහොතේ පාතල් පාර පැන කාරිය පිටිපස්සෙන් වැව් බන්ට් එක දිගේ දිව ගොස් කොටේ අමාරුවෙන් තරණය කර බෝඩිමට වැදුණු අකාරය එදා කඩේ වේටින් ලිස්ට් එකේ සිටියවුන්ට තාමත් මතකලු.